Autoprodukzio kolektiboa behe-tentsioko sarearen bidez

Behe-tentsioko sarearen bidezko autoprodukzio kolektiboaren modalitatea 244/2019 Errege Dekretuan araututa dago. Hori gertatzen da energia elektrikoa erabiltzeko hainbat puntuk (etxebizitzak, lokalak, industria-nabeak, instalazioak...) hurbil dauden baina, kasu batzuetan edo guztietan, zuzenean barneko instalazio elektrikoarekin konektatuta ez dauden eta, ondorioz, sortutako energia iristarazteko behe-tentsioko banaketa-sarea behar duten sorkuntza-instalazio bateko edo batzuetako energia erabiltzen dutenean.

Araudiak xedatzen du, modalitate hori hautatzeko, energia erabiltzen eta sortzen duten instalazioen artean, gutxienez, honako betekizun hauetako bat bete behar dela:

500 metroko edo gutxiagoko distantzia. Baina estalki baten gainean, industrialde batean edo energia ekoizteko eginkizun nagusia ez duten egitura artifizialetan (adibidez, aparkalekuetako markesinak) dauden instalazio fotovoltaikoen kasuan, distantzia 2000 metrokoa izango da.
Behe-tentsioko transformadorea partekatzea.
Katastroko erreferentzia bera izatea.

Autoprodukzio kolektiboko beste modalitateetan bezalaxe, sorkuntza-instalazioarekin lotutako erabiltzaile guztiek autoprodukzio-modalitate bera hautatu behar dute.

Sortutako energiaren banaketa

Sortutako energia autoprodukzio kolektiboko beste modalitate guztietan bezala banatu egiten da. Aldaketa bakarra hauxe da: sorkuntza-puntuei lotuta dauden energia erabiltzeko puntuek behe-tentsioko sare elektrikoa erabiltzeagatiko bidesari bat ordaindu beharko dute (aurrerago azalduko dugu hori).

Autoprodukzio kolektiboko modalitateetan energia nola banatzen den zehatz-mehatz jakiteko, kontsultatu artikulu hau: Energiaren banaketa autoprodukzio kolektiboan.

Behe-tentsioko sare elektrikoa erabiltzeagatiko bidesaria

Araudiak (244/2019 Errege Dekretuko 17.5. artikuluak) xedatzen du, hurbileko instalazioetan autoprodukzio ondorioetarako banaketa-sarearen bitartez energia transferitzen bada, gainera, lotutako erabiltzaileek zenbateko bat ordaindu beharko dutela sarea erabiltzeagatik. Zenbateko hori Merkatu eta Lehiakortasun Batzorde Nazionalak zehazten du eta, oraingoz, ebatzi du (Ministerioaren onespenaren zain dago) 0 € izango dela behe-tentsioko sarera konektatuta dauden sorkuntza- eta hornidura-puntuetarako.

Konpentsazio sinplifikatua behe-tentsioko sarearen bidezko autoprodukzio kolektiboan

Trantsizio Ekologiko eta Erronka Demografikorako Ministerioaren arabera, banaketa-sarearen bidez sorkuntzara konektatutako energia erabiltzeko puntu batek konpentsatutako autokontsumo-modalitatea hauta dezake, baina, horretarako, sorkuntza-instalazioak barruko sarearen bidez, gutxienez, lotutako energia erabiltzeko puntu batera konektatuta egon beharko du.

Hau da, autoprodukzio kolektiboko konfigurazio batean, sare bidezko kontsumo-puntu batzuk badaude, baina sorkuntza-instalazio guztiak barruko sarearen bidez kontsumo-puntu batera konektatuta badaude, sistemako kontsumo-puntu guztiek izango dute konpentsazio sinplifikatua jasotzeko eskubidea.

Konpentsazio sinplifikatua duen sare bidezko autoprodukzio kolektiboaren konfigurazio-eredua

Jarraian azaltzen dugun autoprodukzio kolektiboko konfigurazio-ereduan sorkuntza-instalazio guztiak barruko sarearen bidez konektatuta daude, gutxienez, energia erabiltzeko puntuetako batean. Konfigurazio honekin, energia erabiltzeko puntu guztiek (pisuek, eskolak eta etxebizitzek) izango dute konpentsazio sinplifikatua jasotzeko eskubidea, zenbaitzuek sortutako energia erabiltzeko banaketa-sarea behar arren.

Konpentsazio sinplifikatua jasotzeko aukera ez duen sare bidezko autoprodukzio kolektiboaren konfigurazio-eredua

Bestetik, honako konfigurazio honek ezingo du konpentsazio sinplifikatuko modalitatea hautatu, sorkuntza-puntua ez dagoelako barruko sarearen bidez konektatuta energia erabiltzeko ezein puntura. Kasu honetan, Sektore Elektrikoaren Legeak xedatzen duen bezala, nahitaezkoa izango da soberakinak dituen sare bidezko autokontsumo kolektiboko modalitatea hautatzea eta soberakinak merkatu elektrikoan saltzea.