Komenigarria da autoprodukzio-instalazioetan bateriak edo energia metatzeko sistemak jartzea?

Autoprodukzio-instalazio batean bateriak jartzea beharrezkoa den ala ez erabakitzeko, aztertu behar duzu zer-nolako instalazioa duzun. Lehenik –eta oraingo elektrizitate-erabilera oinarri hartuta– instalazioaren helburua zehaztu behar duzu: zenbateko autosufizientzia lortu nahi duzun, horrek zer independentzia-maila ematen dizun, zenbat aurreztu nahi duzun, eta abar. 

Gogoan izan, zure instalazioa sare elektrikora konektatutako hornidura-puntu baterako baldin bada, ez dela ezinbestekoa bateriak jartzea, aukerakoa baizik; eguzkirik egiten ez duenean eta energia sortzen ez duzunean, sareko energia erabili ahalko duzu eta.

Baina zure autoprodukzio-instalazioa saretik isolatutako puntu baterako bada, bateriak ezinbestekoak dira une oro energia jasotzen duzula bermatzeko, baita zure instalazioak energiarik sortzen ez duenean ere.

Horiek horrela, sarera konektatutako instalazioetan, kontuan hartu behar dugu, duela gutxira arte, ondo dimentsionatutako autoprodukzio-sistemek soberazko energia gutxi sortzen zutela, helburua ekoizteko unean ahalik eta energia gehien erabiltzea zelako. Gaur egun, aldiz, araudi-aldaketaksoberakinen konpentsazio sinplifikatu eta ekonomikoa ahalbidetzen du jarduera ekonomiko gisa alta emateko beharrik gabe eta, ondorioz, autoprodukzio-instalazioa hein batean neurriz kanpo dimentsionatzea erakargarriagoa eta errazagoa da. Izan ere, instalazioak sortzen duen eta zuk aprobetxatzen ez duzun energia erabili duzun sareko energiarekin konpentsatuko zaizu elektrizitate-fakturan.

Bestetik,Flux Solar zerbitzua soberakinen konpentsazio sinplifikatura gehitzen da, modalitate hori aktibo duten autoprodukzio-kontratu guztiei aplikatuko baitzaie. Horri esker, soberazko energia hobeto aprobetxatzen da instalazioan bateriak jartzeko beharrik gabe.

Aukera dugu ere hasieratik bateriak jartzeko eta instalazioaren tamaina bateriak izango dituela kontuan hartuta kalkulatzeko, metatu eta geroago erabiltzeko behar adina energia sortzeko.

Baterien alde onak eta txarrak

Bateriak instalatzeak dituen alde on eta txarrak arretaz baloratu behar ditugu:

Baterien alde onak: energia sortzen ez dugunean, jatorri berriztagarriko eta autoproduzitutako energia jasotzeko aukera. Horrek sistemaren independentzia energetikoa indartzen du eta sistema elektrikoaren deszentralizazioa laguntzen du.

Bestetik, kontuan hartu behar dugu bateriak oso interesgarriak direla sortutako energia eta, bereziki, soberazko energia, kudeatzeko, autokontsumo kolektiboaren bidezpartekatzeko aukerez gain, besteak beste, sareko energia galtzea saihesten dutelako.

Ekoizpen fotovoltaikoak eguerdian gora egiten duenez eguzki-erradiazioa handiago delako, aurreikusten da, merkatu elektrikoan, soberakinen konpentsazio-prezioak behera egitea. Hori gertatzen denean mereziko du bateria fisiko bat jartzea.

Horrek lotura zuzena du energia berriztagarrien aldizkako funtzionamenduak planteatzen duen erronkarekin: gauean plaka fotovoltaikoek ez dute energiarik ekoizten, eta haizea, energia eolikoaren kasuan, eta ura, energia hidroelektrikoaren kasuan, ezin dira erraz kudeatu; beraz, haien kudeaketa ez da gasarekin funtzionatzen duen ziklo konbinatuko instalazio batena bezain erraza. Arazo hori konpontzeko, jatorri berriztagarriko energia metatzeko modua bilatu behar da, energia ekoiztu ezin den unean erabili ahal izateko. Hau da, plakak energia sortzen ari ez direnean plakek berek sortutako elektrizitatea erabiltzeko aukera ematen dute bateriek.

Alde txarrak: instalazioaren prezioa nabarmen igotzen dute; gaur egun, baterien prezioak etxeko instalazio konbentzional baten prezioa bikoiztu edo are gehiago garestitu dezake.

Halaber, abantaila ekonomikoak aztertu behar dira: esan bezala, soberakinen konpentsazio sinplifikatuari Flux Solar zerbitzuaren bidez lortu daitekeen deskontua gehitu behar zaio.

Erabakitzeko, aipatutako balorazio ekonomiko positiboa baterien kostuarekin alderatu behar duzu. Kalkulu hori egiteko, besteak beste, alderdi hauek hartu behar dituzu gogoan: zure elektrizitate-erabilera ordutegien arabera eta energiaren prezioa epe ertainera.

Era berean, arreta ipini behar dugu bateriak egiteko lehengaiak ekoizten dituzten herrialdeetako ingurumen- eta gizarte-problematiketan. Hainbat erakundek salatu dute bateriak fabrikatzeko behar diren mineralak erauzten dituzten langileen lan-baldintzak zalantzagarriak direla [1]. Beraz, bateriak dituen sistema bat aukeratzen baduzu, garrantzitsua da hori kontuan hartzea, instalazioa ondo dimentsionatzeko eta modu arduratsuan erabiltzeko.

Azkenik, gogoan hartu, gaur egun, bateriek 10-15 urte inguruko balio-bizitza dutela.

Kontuan hartu behar dugu baterien teknologia abiadura handiz eboluzionatzen ari dela eta, gutxi barru, merkeagoak izango direla, gaitasun eta prestazio hobeak izango dituztela eta, gainera, hain urriak ez diren, ingurumenean eta gizartean hainbesteko kaltea eragiten ez duten eta errazago birzikla daitezkeen materialekin ekoiztuko direla.

Era berean, etorkizunean, beharbada, bateriak partekatzeko aukera izango dugu, adibidez, pisu-bloke edo auzo berean.

Informazio hau abiapuntu ona izan daiteke zer-nolako autoprodukzio-instalazioa behar duzun eta bateriak behar dituzun ala ez pentsatzeko. Baina Som Energia ez da ingeniaritza-enpresa bat, ezta eguzki-proiektuak instalatzen dituen enpresa bat ere, eta ezin dizugu lagundu zure instalazio partikularraren betekizun teknikoak zehazten.

Hortaz, Kooperatibak abiatutako erosketa kolektibo batean izena eman baduzu eta zalantza teknikoak badituzu, galdetu zuzenean enpresa esleipendunari. Bestela, sektoreko enpresa adituak aurkituko dituzu bilatzaile honetan. 

Energia metatzeko beste sistema batzuk 

Zure autoprodukzio-instalazioak ekoizten duen soberazko energia aprobetxatzeko beste modu bat biltegiratze termikoa da.  

Biltegiratze termikoa ur bero sanitarioaren metagailu batekin egin daiteke. Eta etxebizitza bera ere izan daiteke metagailu handi bat, isolamendu ona badu eta eraikuntza-materialak egokiak badira, unearen arabera, hotza edo beroa metatzeko, eta, adibidez, ordu batzuk igarotakoan berogailua piztu behar ez izateko.

Beraz, sistema fotovoltaiko bat baduzu, oso interesgarria izan daiteke aerotermia-sistema batekin konbinatzea, bi teknologia horiek oso ondo baitabiltza batera.

Ibilgailu elektrikoen bateriak

Ibilgailu elektrikoen bateriak kontuan hartu beharreko elementuak dira ere.

Badago dagoeneko, kapazitate-murrizketa dela kausa, baztertu diren auto-bateriak autoprodukzio-instalazioetarako bateria gisa aprobetxatzeko aukera ikertzen ari den proiektu bat edo beste. Ikusi beharko dugu, behar beste ibilgailu elektriko zahar ditugunean, aukera hori bideragarria ote den.

Oraindik eboluzionatu behar duen beste ideia bat V2G (ingelesez, Vehicle-to-grid, ibilgailua sarean) edo V2H (ingelesez, Vehicle-to-home, ibilgailua etxean) sistema da.  Teknologia horrek ahalbidetzen du ibilgailu elektrikoaren bateriak –behar adina kargatuta dagoenean– etxebizitzako sarera energia hornitzea. Hala, ibilgailu elektrikoaren bateria beharren arabera karga edo deskarga daiteke, eta bateria egonkor baten antzeko prestazioak ematen ditu. Prestazio interesgarria izan daiteke hori energia % 100 berriztagarria hornitzen duten kargatzeko puntuak aprobetxatzeko. 

****

[1] Ikus artikulu hau:La batería, punto débil del vehículo eléctrico Opcions [2018/09/12an argitaratua]