Elektrizitatearen jatorria Som Energian

Som Energiak % 100 berriztagarriak diren iturrietatik sortutako elektrizitate berdea merkaturatzen du. Hori bermatzeko, jatorriaren berme-ziurtagiriak ditugu. Ziurtagiri horiek elektrizitatea iturri berriztagarriekin sortzen duten instalazioei entregatzen zaizkie, eta ziurtagiri bakoitzak zenbat energia sortu eta sareratu den adierazten du. Beren aldetik, instalazio ekoizleek ziurtagiriak dagozkien enpresa merkaturatzaileei transferitzen dizkiete.

Horregatik, esan dezakegu % 100 berriztagarriak garela, jatorriaren berme-ziurtagiriek bermatzen baitute bazkide eta erabiltzaileek eskatu duten energiaren % 100 energia berriztagarria sortzen duten instalazioek sortu dutela. Halaber, Kooperatibaren konpromisoa betetzen dugu: agerian jartzen dugu herritarrek energia-iturri jakin batzuk (berriztagarriak) beste batzuk (fosilak eta nuklearrak) baino nahiago dituztela.

Gogoan hartu behar dugu energia berriztagarria ezin dela energia fosil edo nuklearretik bereizi elektrizitatearen garraio- eta banaketa-sarean; hortaz, sarean ekoizpen-iturri guztietako elektrizitatea nahasten da. Som Energiaren ekoizpen-instalazioek sortzen duten elektrizitatea ezin da zuzenean iritsi bazkide diren lagunen etxeetara edo erakundeen lokaletara. Baina Kooperatibak bermatzen du bazkide eta bezeroek sarera konektatzen direnean erabiltzen duten energia-kantitate bera sorkuntza berriztagarriko gure proiektuen edo haien jatorriaren berme-ziurtagiriak transferitzen dizkiguten beste proiektu laguntzaile batzuen bidez iritsi dela aurretik sare horretara.

Merkaturatzaile berdearen (% 100 berriztagarria) etiketa lortzeko, Kooperatibak Merkatu eta Lehiakortasun Batzorde Nazionalak (MLBN) zuzendutako ziurtapen-prozesua gainditu behar du. MLBN Kooperatibak merkaturatzen duen energia-bolumena jasotako jatorriaren berme-ziurtagirietako energia-bolumenarekin bat datorrela ziurtatzeaz arduratzen den erakundea da.

Nola lortzen ditugu jatorriaren berme-ziurtagiriak?

Som Energiak energia berriztagarria (bereziki, fotovoltaikoa, eolikoa eta minihidraulikoa) ekoizteko proiektuak garatzen ditu. Proiektu horiei esker lortzen ditugu merkaturatutako energia-bolumenerako behar diren jatorriaren berme-ziurtagiri batzuk, baina ez denak.

Hala, gure instalazio propioen ziurtagiriak erabiltzeaz gain, beste ekoizle batzuekin elkarlanean aritzen gara. Bereziki, oligopoliotik kanpo dauden eta Kooperatibak defendatzen dituen balioekin bat datozen ekoizle berriztagarriei energia erosten saiatzen gara. Lehentasuna ematen diegu energia eoliko, fotovoltaiko eta eguzki-energia termoelektrikoarekin lortutako ziurtagiriei, eta iberiar penintsulan, Balearretan edo Kanarietan dauden proiektuekin bakarrik lan egiten dugu.

Som Energia, merkatuko ordezkaria

Kooperatiba ekoizpen berriztagarriko instalazioen (gureak eta interesa duten pertsona edota enpresenak) ordezkaria da merkatuan; hau da, ekoiztutako energiaren salmenta eta prima jasotzeko eskubidea duten instalazioei dagokien berariazko ordainsaria tramitatzen ditu. Horri esker, energiaren jatorria % 100 berriztagarria dela bermatzen duten ziurtagiriak eskuratzen ditugu. Hala, ekoizten duten elektrizitatea guri saltzen uzten diguten ekoizpen berriztagarriko parkeek haien ziurtagiriak modu zuzenagoan lortzeko aukera ematen digute, lankidetza horren bidez.

Gainerako ziurtagiriak horiek transferitzen dituzten bitartekarien bidez lortu ditugu, merkatuaren eboluzioaren arabera, haiekin prezio bat adostuta.

Ordezkaritza-lanaren gaineko informazio gehiago aurkituko duzu Autoprodukzioa eta soberakinen salmenta artikuluan.

Erakunde edo enpresa bat zara eta zure energiaren jatorria % 100 berriztagarria dela bermatzen duen ziurtagiri bat behar duzu?

Erakunde edo enpresa gisa, agian interesatuko zaizu ziurtatzea zure jarduerarako erabiltzen duzun energia jatorriko berriztagarrikoa dela. Hori ohikoa da ingurumen-kudeaketaren arloko kontu-ikuskapenak edo ziurtapenak egiten direnean.

Hala, Kooperatibak, MLBNk igorritako jatorri-bermearen ziurtagiriarekin, aldi berean, Som Energiarekin kontratu bat duten erakunde eta enpresei ziurtagiri bat egin diezaieke, nahi izatekotan. Horretarako, beheko irudiko dokumentuaren antzeko bat igortzen dugu.

Zure energiaren jatorria % 100 berriztagarria dela bermatzen duen ziurtagiri bat behar duzu, bidali mezu bat empresa@somenergia.coop helbidera.

Kontuan hartu ezin dugula ziurtagirik igorri guk ziurtagiri ofiziala izan arte. Eskuarki, MLBNren ziurtagiria hurrengo urteko apirilean edo maiatzean iristen da; beraz, ordura arte ezin ditugu igorri erakunde eta enpresek urte horretarako eskatu dizkiguten ziurtagiriak.

Som Energiarekin kontratua beranduago egin baduzu eta ziurtagiriren bat behar baduzu, erabiltzen duzun energiaren jatorria % 100 berriztagarria dela bermatzen duen titulartasun-ziurtagiri bat eska diezagukezu. Horretarako, bidali mezu bat empresa@somenergia.coop helbidera.