Autoprodukzio-soberakinen konpentsazio-prezioaren eta erosketa-prezioaren arteko diferentzia

Eskaintzen ditugun ordutegi-tarteen tarifak berraztertzen badituzu, ikusiko duzu autoprodukzio-soberakinen konpentsazio-prezioa beti dela energiaren erosketa-prezioa baino txikiagoa, konparazioa denboraldi batean edo bestean egin.

Diferentzia hori ulertzeko, kontuan hartu behar duzu, Kooperatibaren tarifetan, energiaren salmenta-prezioa, funtsean, honako kontzeptu hauen batura dela:

• Energiaren prezioa.
• Legez ezarritako kostu arautuak, hauek barne hartuta:
  • MLBNk zehaztutako sarbide-bidesariak.
    • Garraio- eta banaketa-sarea.
  • Dagokion ministerioak ezarritako karguak.
    • Berriztagarriei, kogenerazioari eta hondakinei dagokien hobaria (RECORE).
    • Sistema elektrikoaren defizita.
    • Sistema ez-penintsularren ordainsaria.
    • MLBNren tasa.     
    • Hondakin erradioaktiboen plan orokorra.
• Sistemaren kostuak:
  • Kapazitategatiko ordainketak.
  • Sarea kudeatzeak sortutako gainkostuak.
  • Sarearen galerak.
• Jatorri-bermearen ziurtagiriak. 
• Komertzializazio-marjina.

Kontzeptu horiei dagozkien zergak gehitu behar zaizkie.

Bestetik, soberakinen konpentsazio-prezioak ez ditu barne hartzen kontzeptu horietako asko, ez baitzaizkio aplikatzen. Hala nola kostu arautuak (bidesari eta karguak), sistemaren kostuak eta komertzializazio-marjina. Horiek horrela, azken prezioa Kooperatibaren tarifetako prezioa baino txikiagoa da, kostaprezio moduan ezartzen dugun energiaren erreferentzia-prezioari bakarrik dagokiolako. Prezio hori tarifak aldatzen ditugunean zehazten dugu, eta prezio bakarra da denboraldi eta tarifa guztietarako.

Erreferentziako prezioa

Konpentsazioa egiteko erreferentziako prezio energia baliokideak Kooperatibarentzat duen batez besteko kostua da. Konpentsatzen dugun energia eguzki-orduetan sortua denez, eguzki-ordu berberetan energiak guretzat duen kostua hartzen dugu erreferentzia gisa.  

Energia-ekoizpena eta -eskaria eguzki-orduetan

Azken urteetan, energia gehiago sortzen duten plaka fotovoltaikoen instalazioek goraldia izan dute, nola eremu partikularrean nola industrialean. Eguzki-orduetako energia-eskaria, aldiz, ez da hainbeste hazi eta, ondorioz, energiaren prezioa eguzki-orduetan bereziki baxua da sarri. Kontuan hartu, batzuetan, ekoizpena eskaria baino handiagoa dela. 

Gu planetara moldatu, eta ez alderantziz

Gizarte moduan, gure erronka da energia ekoizten den orduetan, kasu honetan eguzki-orduetan, kontsumitzen saiatzea. Som Energian hori sustatzeko neurriak aztertzen ari gara, hala nola tarifa berriak edo oraingo tarifak moldatzea.

Izan ere, gu moldatu behar gara planetaren baliabideetara, eta ezin dugu eskatu planetak gure “behar” guztiak asetzea. Elektrizitatea oinarrizko ondasun mugatu bat da. Horregatik, garrantzitsua da elektrizitatea ez xahutzea eta modu arduratsuan erabiltzea. Bada, argia ekoizpen handieneko orduetan erabiltzeak Kooperatibak bultzatzen duen eredu energetikoaren aldaketa sustatzen du.