Bonu soziala

[També en: català] [También en: castellano] [Tamén en galego]

Zer da bonu soziala?

Bonu soziala Gobernuak sortutako laguntza bat da: zaurgarritzat jotzen diren kolektibo jakin batzuei elektrizitate-fakturan deskontu bat egiten zaie. 

Gaur egun, elektrizitatea-fakturako potentzia-terminoan eta energia-terminoan, % 25eko deskontua egiten zaie kontsumitzaile zaurgarriei,% 40ko deskontua zaurgarritasun larriko kontsumitzaileei eta % 100eko deskontua baztertuta egoteko arriskuan dauden kontsumitzaileei.

Xedatutako betekizunak betetzen badituzu, bonu soziala eska dezakezu, baldin eta elektrizitate-kontratua erreferentziako merkaturatzaile batekin (merkatu arautua) egin baduzu eta etxebizitza ohikoa bada.

Gainera, COVID-19ak eragindako pandemia-egoera kontuan hartuta, onuradun berrientzako betekizun berezi batzuk ezarri dira, eta haiek % 25eko deskontua jaso dezakete.

Zeintzuk dira erreferentziako merkaturatzaileak?

Konpainia elektriko hauetako edozeinekin egin dezakezu kontratua, etxebizitza non dagoen kontuan hartu gabe.

Gogoan izan kontsumitzaile txikiarentzako borondatezko prezioaren tarifa (PVPC gaztelaniaz), hots, tarifa arautua, eskatu behar duzula, eta Bonu Soziala aplikatzeko eskaera eta beharrezko dokumentazioa aurkeztu behar dituzula.

Nola eska dezaket?

Bonu soziala eskatzeko formularioak (mota ezberdinetakoak daude) eta aurkeztu beharreko dokumentazioa (laguntza eskatzeko arrazoiaren arabera) erreferentziako merkaturatzaileen webguneetan kontsulta ditzakezu.

Industria, Energia eta Turismo Ministerioaren Bonu soziala webgunean informazio gehiago aurkituko duzu.

Eta zer gertatzen da Som Energiarekin?

Zoritxarrez, Som Energiak ezin du aplikatu Gobernuak sortutako Bonu Soziala, merkatu libreko merkaturatzaileak garelako eta ez merkatu elektriko arautuko merkaturatzaileak; eta merkatu elektriko arautuko merkaturatzaileek bakarrik eskain dezakete laguntza hori.

Halere, beste merkaturatzaile guztiak bezala, bonu soziala finantzatzeko ekarpenak egitera behartuta gaude. Kargu hori Kooperatibaren kostuen barruan sartzen dugu, eta fakturan kontzeptu horregatik zenbat ordaintzen dugun azaltzen dugu.

Bonu soziala merkatu arautuko enpresek bakarrik aplika dezaketenez gero, argia zeinekin kontratatu nahi dugun aukeratzeko askatasuna mugatua dugu. Horrela, merkatu libreko merkaturatzaile batekin kontratatzen duten lagunek eskubidez dagokien laguntza bat jasotzeko aukera galtzen dute.

Kooperatibak uste du erregulazio hori berraztertu beharko litzatekeela. Era berean, ez dugu baztertzen egunen batean erreferentziako merkaturatzaile izateko aukera, gure helburuak lortzeko baliagarria balitz. Bere garaian baloratu beharko dugu, oraindik ez baititugu betetzen merkatu arautuan operatzeko eskatzen diren betekizunak.

Nolanahi ere, gogoan izan behar dugu, laguntza ekonomikoez gain, kontratazio-baldintzak berrikustea eta energia modu efizienteagoan erabiltzea fakturaren kostua modu jarraituan murrizteko eta ingurumen-inpaktua murrizteko estrategiak direla ere.

No encuentras lo que buscas? Contactar Contactar