Goi-tentsioko 6.1TD, 6.2TD, 6.3TD eta 6.4TD tarifak

6.X tarifen multzoan goi-tentsioko tarifa guztiak sartzen dira, hau da, 1 kV-tik gorako sarrera-tentsioa duten horniduretarako tarifak.

Horiek dira tarifa-mota ohikoenak industrialdeetan, baina baita behe-tentsioko banaketa-sareetatik urrun dauden hornidura-puntuetan ere, zeinak goi-tentsioko sareetara konektatzen baitira (egoera hori landa-eremuetan gerta daiteke).

Tentsioaren arabera, honako sarrera-tarifak izango ditugu:

6.1TD tarifa: 1 kV-tik gorako baina 30 kV-tik beherako tentsioa.
6.2TD tarifa: 30 kV-ko edo hortik gorako eta 72,5 kV-tik beherako tentsioa.
6.3TD tarifa: 72,5 kV-ko edo hortik gorako eta 145 kV-tik beherako tentsioa.
6.4TD tarifa: 145 kV-ko edo hortik gorako tentsioa.

Kooperatibaren webguneko elektrizitate-tarifen atalean 6.1TD tarifaren prezioak aurkituko dituzu, hori baita goi-tentsioko tarifa ohikoena. Zure hornidurako sarrera-tentsioa 30 kV-tik gorakoa bada eta Kooperatibarekin kontratatu nahi baduzu, bidali mezu bat empresa@somenergia.coop helbidera eta behar duzun informazioa emango dizugu.

6.1TD, 6.2TD, 6.3TD eta 6.4TD tarifen ezaugarriak

Ordutegiak eta denboraldiak

6.1TD, 6.2TD, 6.3TD eta 6.4TD tarifek 6 energia- eta potentzia-denboraldi dituzte (P1, P2, P3, P4, P5 eta P6), eta denboraldi bakoitzean energiaren eta potentziaren prezioa desberdina da: P1 denboraldiko prezioak altuenak dira eta hortik jaisten doaz, P6 denboraldiko prezio merkeenetara iritsi arte.

Eremuaren (penintsula, Balear uharteak eta Kanaria uharteak) arabera eta urteko hilabetearen arabera, denboraldi bat edo beste aplikatuko da. Informazio gehiago aurkituko duzu artikulu honetan: 3.0TD tarifaren eta goi-tentsioko 6.1TD, 6.2TD, 6.3TD eta 6.4TD tarifen ordutegiak eta denboraldiak

6 potentzia kontratatzea

Potentzia desberdin bat kontrata daiteke sei denboraldietako bakoitzerako, eta potentzia-denboraldiak energia-denboraldiekin bat datoz. Baina, potentzia gorakorren irizpideari jarraitu behar diote, hau da, denboraldi jakin batean kontratatutako potentziak aurreko denboraldikoaren berbera edo handiagoa izan behar du. Horrek zera esan nahi du: P1 <= P2 <= P3 <= P4 <= P5 <= P6.

Kontratatutako potentzia hobetzeko aukera

Hornidura ez da inola ere etengo kontratatutakoa baino potentzia handiagoa erabiltzeagatik.

Faktura 6.1TD, 6.2TD, 6.3TD eta 6.4TD tarifekin

Potentziaren fakturazioa

Potentzia-terminoa bi kontzeptutan fakturatzen da: alde batetik, sei denboraldietako bakoitzerako kontratatutako potentzia fakturatzen da eta, bestetik, potentzia-gehiegikeriak edo zigorrak, denboraldi bakoitzerako kontratatutako potentzia gainditzen denean.

Zigorren kostua zehazteko, kontratatutako potentzia kontuan hartu beharko da.

Hala, 15-50 kW(barne) bitarteko potentzia kontratatzen dugunean, kontratatutako potentzia gainditzeagatik ezarritako zigorra gainditutako potentziaren prezioa izango da, bider erabilitako potentziaren eta kontratatutako potentziaren arteko aldearen bikoitza. Informazio gehiago aurkituko duzu artikulu honetan: Potentzia-gehiegikerien kostua 15 eta 50 kW bitarteko tarifetan
Bestetik, 50 kW-tik gorako potentzia kontratatzen dugunean, zigorra kontratatutako potentzia gainditzen duen ordu-laurden bakoitzeko ezarriko da. Informazio gehiago aurkituko duzu artikulu honetan: Potentzia-gehiegikerien kostua 50 kW-tik gorako tarifetan

Erabilitako energiaren fakturazioa

Denboraldi bakoitzean erabilitako energiaren kostua da. Denboraldi bakoitzean erabilitako kWh-ak denboraldi bakoitzean kWh-ak duen prezioaz biderkatzen dira.

Energia aktiboaren prezioa (€ / kWh) desberdina da denboraldi bakoitzean, eta prezioak gora doaz batetik bestera. Denboraldi garestiena P1 da, eta gainontzekoetan (P2, P3, P4 y P5) prezioak pixkanaka-pixkanaka behera egiten du. P6 denboraldiko prezioa da merkeena.

Som Energiaren prezioak gure webguneko tarifen atalean daude ikusgai.

Energia erreaktiboaren fakturazioa

Instalazio elektrikoetan energia erreaktiboa agertzen da funtzionatzeko eremu magnetiko eta elektrikoak sortu behar dituzten gailuak erabiltzen direnean. Energia erreaktiboak banaketa oztopatzen du; horregatik, sarera energia gehiegi isurtzearen ondoriozko errekarguak sortu ziren. Termino honetan, Som Energiak ez du ezein mozkin-marjinarik aplikatzen.

Fakturako beste kontzeptu batzuk

Fakturan kostu osoa kalkulatzeko gehitu behar diren beste kontzeptu batzuk ikusiko dituzu ere:

Ekipoen alokairua: gure fakturaren bidez banatzaileari ordaintzen diozun kontagailuen alokairua da. Kontagailua zurea bada (ez da ohikoa), 0 € ordainduko duzu.
Elektrizitatearen gaineko zerga: Gobernuak araututako zerga bat da (BEZa ezarri behar zaio). Legeak hobariak ezartzen ditu jarduera ekonomiko jakin batzuetarako. Esteka honetan azaltzen dugu hori: Elektrizitatearen gaineko zergaren hobaria
Une honetan BEZa % 21 da.
Borondatezko dohaina: kontzeptu hau BEZetik salbuetsita dago.
Sarbide-, luzapen-, lotura-, egiaztapen- edo ikuskaritza-eskubideak: enpresa banatzaileak gure fakturaren bidez kobratuko dizkizu kontzeptu hauek horniduraren alta tramitatzen baduzu edo kontratua aldatzen baduzu.